ഇന്ത്യൻ ഓൾറൗണ്ടർ ഹാർദിക് പാണ്ഡ്യ പൊഫ്രഷണൽ ക്രിക്കറ്റിലേക്ക് തിരിച്ചുവരുന്നു. സെപ്റ്റംബറിൽ നടന്ന ഏഷ്യാ കപ്പിനിടെ പരിക്കേറ്റ ഹാർദിക് 42 ദിവസമായി വിശ്രമത്തിലായിരുന്നു. 32കാരനായ ഹാർദിക് തന്റെ സഹോദരൻ ക്രുണാൽ പാണ്ഡ്യ ക്യാപ്റ്റനാകുന്ന ബറോഡ ടീമിലേക്കാണെത്തുന്നത്. സയ്യീദ് മുഷ്താഖ് അലി ട്വന്റി 20 ക്രിക്കറ്റ് ടൂർണമെന്റിൽ ബറോഡ ടീമിൽ ഹാർദിക് മൂന്ന് മത്സരങ്ങൾ കളിക്കും.
ഡിസംബർ രണ്ട്, നാല്, ആറ് തിയതികളിലാണ് ബറോഡ ടീമിന്റെ മത്സരങ്ങൾ. ഇതിന് പിന്നാലെ ഡിസംബർ ഒമ്പതിന് ഇന്ത്യയും ദക്ഷിണാഫ്രിക്കയും തമ്മിലുള്ള ട്വന്റി 20 പരമ്പര ആരംഭിക്കും. ഈ പരമ്പരയിലൂടെ ഇന്ത്യൻ ദേശീയ ടീമിലേക്കും ഹാർദിക് തിരിച്ചെത്തുമെന്നാണ് പ്രതീക്ഷ. നാളെ ആരംഭിക്കുന്ന ദക്ഷിണാഫ്രിക്കയ്ക്കെതിരായ ഏകദിന പരമ്പരയിൽ ഹാർദിക്കിനെ ഉൾപ്പെടുത്തിയിട്ടില്ല.
2026 ഫെബ്രുവരി - മാർച്ച് മാസങ്ങളിലായി നടക്കുന്ന ട്വന്റി 20 ലോകകപ്പാണ് ഹാർദിക്കിന് മുന്നിലുള്ള മറ്റൊരു പ്രധാന ടൂർണമെന്റ്. പിന്നാലെ ഇന്ത്യൻ പ്രീമിയർ ലീഗിലും ഹാർദിക്കിന് കളിക്കേണ്ടതുണ്ട്. ഐപിഎല്ലിൽ മുംബൈ ഇന്ത്യൻസിന്റെ നായകൻ കൂടിയാണ് ഹാർദിക് പാണ്ഡ്യ.
Content Highlights: Hardik Pandya will be playing 3 matches in SMAT